مش أي حد عنده انكار الذات
مش عارف أنا إيه المشكلة لما نتغلب؟؟
دا بقي العادي يعني... أهلي ايه اللي نغلبه ده كمان
الأهلي مش مستوانا أصلاً
وبعدين احنا بنسيبه يغلبنا عشان منزعلش مشجعي الأهلي الغلابة اللي ممكن يزعلوا أوي لو الأهلي اتغلب من الزمالك.. حتي يبقي شكلها وحش أوي
وإيه المشكلة لما الأهلي يغلب ماتشين في اسبوعين ورا بعض.. وإيه المشكلة لما المدرب ينزل براس حربة واحد ومعندوش صانع العاب.. عادي جدًا دا نادي الزمالك
طب بلاش دي.. إيه المشكلة لما يجي سيادتة المستشار المحترم مرتضي بيه منصور ويلغي الإنتخابات.. ويرجع الزمالك تاني لنقطة الصفر.. عادي جدًا يا جماعة الحاجات دي متحصلش إلا في الزمالك
حد نبيه يسألني سؤال أنبه ويقولي ليه؟
أقوله ليه
لأن نادي الزمالك بيحب مصر.. مصر ولا الزمالك.. مصر طبعًا
وكمان عندنا انكار للذات غير عادي.. تبقي منفرد ومتجيبهاش جون..علي فكرة هو مجبهاش جون علشان مش عارف هو مجبهاش عشان انكار الذات
وفي النهاية أحب اشكر المدير الفني هولمان والغاني أجوجو والبرازيلي ريكاردو علي انهم شربوا طبيعة النادي بسرعة وبقي عندهم انكار للذات
وسلام مربع لكل الأهلاوية
